Dilo tsa sesha ruri...!

Source : Kutlwano

Author : Mothusi Soloko

Location : Gaborone

Event : Social

 

Batlogolo ba ga rre ba gorogile kwa masimo ka tshokologo. Re ne re tlhotse kwa tshimong re leta dinonyane rre e ne a ya a thiba diphatlha tse dipotsane di tsenang ka tsone. E sale e re go utlwa modumo wa koloi ra itse gore batlogolo ba gorogile. E ne e le Moagi, mosetsana wa gagwe, Neo, le ngwana wa bone wa mosimanyana, Poloko. Ba ne ba sale ba ikaile fa ba tlaa jela malatsi a bone a boitapoloso mo masimo.

Ra kgatlhantshiwa ke dintsa tsa bone ka mehutahuta, ka palo di supa. Rre a di lebelela ka tshisibalo e kgolo a tloga a mmotsa a re, “ntsa tse o dirang ka tsone dile kanakana?” A seka a bona karabo.Tsa tlala-tlala le lelwapa. Mme a kua fa di ya ntlha ya matlhaku a re, “di kgalemele di ya go ja mae a koko!” Neo a araba ka monyenyo a re, “ga di je mae!”

Modisa wa ga Rre, Semaka, a hakgamala a ba a balelwa ke kgodu ya legapu le a neng a le nwa. Semetshe, Sekoti le Tshumu tsone tsa bo di duma kwa ntle. Dithoto tsa folosediwa kwa ntlong nna ka baya ditlhatlheo mo isong.

Fa re santse re letetse ditlhatleo jalo, Poloko a ba a tabogile le jarata e yotlhe, a fitlhela magapu a baneng ba a beetswe, a pitikolola le lengwe le le kima la wela fa fatshe la thubega fela fa a re o a le tsholetsa.

Ditlhatleo tsa tla batlogolo ba ntsha senkgwe se ba neng ba se pakile. A e gatile nnake e bile e ntse tshweu ka a itse sentle gore rre o e rata e ntse jang. Mokoko wa tla o ntse o nopola nopola fa fatshe. Ya re fa o atamela wa tshikinya diphuka pele ga o tlhaba mokgosi. Ntsa tsa ga Moagi tsa tshabela mo go rona mogodungwana ya nna maloba le maabane. Rre a kukegile maikutlo a di koba a ba a tsaya seme sa dikgomo a kgweetsa e thamaga ka sone. Poloko a lela sa mma ijoo! Fa e le Semanka ene a sule ka ditshego. “Hee, banna ntsa di le kana kana di tshaba koko!” a botsa ka kgakhgamalo.

Nna ka tsaya dikopi, pelo ya ga mme e le khibidu ka a sa fetsa mogodungwana wa gagwe. Ya re fela fa a tsena ka fa magotsetsong, rre a mo tlhaeletsa gore a tle le masufu  a a mo pitseng. A tla ka masufu a le mararo mo sekotleleng, rre a ntsha thipa ya gagwe a segelela masufu a ba a sala a ntse a kokona le lengwe. “Kgomo e yame maloba e sule, e ne e jele mogau,” a tlhalosa. Ya re fa re tsenya mabogo mo sekotleleng boora Moagi ba ema fela rre a ba botsa gore a bone ga ba je nama, “kana le gale lona le nna mo go tsone?” Neo a mo araba ka gore bone ga ba je seruiwa se sesuleng.

Rre a gotlhola go se nene a metsa nama e a neng a e tlhotlha a tloga a re, “le matlhalerwa le e ja e tshela,” a tsaya lerapo le a neng a le kokona a le latlhela kwantle kwa go bo Semetshe. O ne a lebelela dintsa tse ka kelotlhoko e tona a gopola mmutla o o nnang mo legoleng o o dikileng o siya dintsa.  A lebelela e thamaga e e golotseng fa godimo a gopola gore le fa e bile go tweng gompieno o tlaa tla a o tshotse. A ema ka dinao a sa bua sepe a tsaya molamu fa legoreng a tloga a re, “Monna Moagi go na le mmutla, o nnang mo legoleng lele la ga mme, ke batla re tle re o latele o siya dintsa gongwe tse tsa gago di ka o kgona. Ra tswa. Nna, Semanka, rre le Moagi. Tshumu, Sekoti le Semetshe ga di ise di re ka moso tsa re etelela pele fa e le bo Bobby le bo Lee bone ga tshwarwa bothata mme le gale tsa tloga tsa re sala morago.

 Ya re fa re ya re labile legola ra utlwa Semetshe e kua ntlheng ya tlhofi e e ka kwa molapong. Semaka a kua a re o dule. Ra tshematshemela teng ra utlwa e kuwa ntlha ya molapo, ya o busa. Semaka a kuwa a re ,” Koo! Koo! Koo!” ya o lebisa ntlha ya sediba ya re fa o re o siela mo thabeng ya bowa le one wa ya go ralala dihutshane tsa ga Ramodisa. Sekoti ya kopana le tsone, ga senyega, Thumu ya baya rata go o tshwara wa relela, lerole la beta kolobe. Wa tla o lebagane le rona bo Bobby ba sia ba ya go  ithara ka maoto a ga rre. Fa a re ke go bone ka molamu, a wa a ba a thubagana ka mpa ya sebete.

Wa tshosiwa ke go bona sekgwa sa dintsa fa pele ga one ya re o re o boela morago Sekoti ya o tshwara. Rre a emelela fa a neng a le teng ka boitumelo jo bogolo a lebetse le gone gore dintsa di mo digile. Kana tota mmutla o o dikile o jele dinawa mo tshimong.  Rre o ne a tswa go gorosa fa a fitlhela ke santse ke o swaile. O ne a tlogetse a tlhatleile metsi gore a tle a ithole letsatsi. Ke fa re utlwa mme a tlhaba mokgosi ka fa morago ga ntlo. Poloko a tsere sekotlele se se tlhapelang a tlhapisetsa dintsa mo teng. “Heela tlhe mosimanyana ke wena ntsee he o dirang?”  Neo a araba ka gore dintsa di na le lobaka di sa tlhape. Lehulo la molora wa teng le le legolo ka ba ka gopola kobo yame e e leswe.

Mmutla le one ba o gana. Neo a tlhalosa gore  baebele ya re ba seka ba ja sepe se se leroo. Rona ra re letsa leswao.

Fa go tla nako ya go robala, ba tsenela kwa ntlung e ba robalang kwa go yone ba tloga ba tla ba apere disutu. “A lo a tsamaya jaanong?” Rre a botsa. Moagi a araba ka gore ga ba tsamae ba ipaakanyetsa go robala. “Jaanong le kgabela boroko? “Nnyaya rra, ke dilwana tse di robalang. Semanka o ne a lebile diaparo tsa ga Boiki ka botswapelo. Ke a bona o ne a gopotse gore fa sutu e Moagi a ka e mo apolela serame sa mariga se ne se ka itaya fela kwa ntle. Ra isa marapo go beng, rre a sala a le nosi mo isong.

Morago ga lebaka ra utlwa a kgwa lenga, a ba a sala a buwa a le nosi a re, “dilo tsa sesa!” A tima molelo a isa marapo go beng. ENDS

Teaser:

Batlogolo ba ga rre ba gorogile kwa masimo ka tshokologo. Re ne re tlhotse kwa tshimong re leta dinonyane rre e ne a ya a thiba diphatlha tse dipotsane di tsenang ka tsone. E sale e re go utlwa modumo wa koloi ra itse gore batlogolo ba gorogile..